"Эйгэ"

Муус устар 12 күнүгэр Өлүөхүмэ улууһун Дьаарханнааҕы национальнай нэһилиэк эдэр ыччатын форума "Эйгэ" сынньанар киинигэр буолан ааста. Эдэр эрчимнээх, элбэх интэриэһинэй идиэйэлэрдээх, олоҕу кытта тэҥҥэ хардыылыыр, сонун сүүрээни олоххо киллэрэр баҕалаах эдэр дьон түмсэн 10 кл оҕолорун (кылаас салайааччыта Алексеева Л.Н.) ыҥыран форумҥа кытыннардылар. Ханна да буоларын курдук, тыа сиригэр эдэр ыччат ахсаана аҕыйах. Баар да буоллахтарына, ыҥырдыҥ да сүүс бырыһыан тиийэн кэлбэт ханна да баар суол. Ол эрэн эдэр ыччаты көҕүлүүр, түмэр баҕа санаалаах Борис Басыргасов, Сарыал Халланов, Юлиана Кудряшова курдук эдэр ыччаттар мустан, бэйэлэрин тула эдэр дьону ыҥыран, остуол тула олорон сүрдээх интэриэһинэй, аһаҕас кэпсэтиини ыыттылар. Борис Басыргасов өрөспүүбүлүкэҕэ волонтерскай хамсааһын чилиэнэ, өр сылларга элбэх тэрээһиннэргэ волонтерунан үлэлээбит буолан волонтерскай хамсааһын туһунан сиһилии сырдатта, билиитин үллэһиннэ, өрөспүүбүлүкэҕэ буолан ааспыт Муус устар туһунан кэпсээтэ. Кини Азия оонньууларын
кэмигэр "Лучший Тим Лидер" ааты ылары ситиспитэ. Олоххо олус позитивнай көрүүлээх эдэр ыччат.
Юлиана Кудряшова библиотекарь идэлээх буолан,эдэр ыччакка аралдьытар оонньуулары ыытан түргэнник уопсай тылы булары тэрийдэ. Форум кыттыылаахтара "Кэриэстэбил маһыгар" аахсыйаҕа кытыннылар.  Эдэр дьон, үөрэнээччилэр эйэлээх олох туһугар Аҕа дойду сэриитигэр бэйэлэрин олохторун толук уурбут биир дойдулаахтарын ааттарын үйэтитэр сыаллаах аахсыйаҕа Кыһыл сулус орденыгар саллаат аатын суруйан ыйаатылар. Форум кыттыылаахтарыгар кыттыбыттарын иһин туоһу сурук туттардылар. Кыайыы 80 сылыгар аналлаах инники үлэлэрин былаанын торумнастылар. Эдэр ыччат үлэтин өссө күүһүрдэр санаалаах, үөрүү үктэллээх форуму түмүктээтилэр.

Дополнительные фотографии:  Загрузить / Загрузить / Загрузить / Загрузить / Загрузить / Загрузить / Загрузить / Загрузить