"Фотозона нашего дворика"

Атырдьах ыйын  12-15 күннэригэр Уолбукка Дьиэ кэргэн сылын чэрчитинэн "Фотозона нашего дворика" диэн күрэх буолан ааста.  Күрэххэ түөрт ыал кытынна уонна маннык темаларга фотозона оҥорбуттар:
1.МырееваЕЕ - "Дьиэ кэргэн уйата- киһи кута тохтуур, дууһатын сылаанньытар ытык эйгэ" (1 миэстэ)
2.Фомичева АА- " Кэрэ эйгэ"  (2миэстэ)
3.  Павлова МА- " Сир симэхтэрэ сибэкки эйгэтигэр" (3 миэстэ)
4.Соловьева СВ - " Урукку эйгэҕэ эргиллии" (3 миэстэ)
Күрэх кыттыылаахтара сүрдээҕин дууһаларын ууран туран арааһы бары толкуйдаабыттар, оҥостубуттар.
Олохтоох дьон, эдэр ыччат, оҕолор сылдьаннар фотозоналарга хаартыскаҕа түстүлэр, бэйэлэригэр өйдөбүнньүк бэлиэ түгэннэри хааллардылар.
Дьон телефон үйэтэ кэлэн ыал ыалга да сылдьара ахсааннаах буолла. Наадаларын телефонунан быһаарсан баран, бары дьиэҕэ бүгэн олорор үйэтэ кэллэ. Онон маннык күрэҕи ыытар проектар дьону-сэргэни хамсатарга, сэргэхситэргэ, бэйэ-бэйэҕэ сылдьыһан дьону түмсүүлээх оҥорорго  наадалаах.Эдэр ыал кэрэни кэрэхсииргэ саастаах ыалтан уопут ылан эдэрдии эрчимнэрин уһугуннарар.
Бэйэбит дэриэбинэбитигэр саҥа сүүрээни киллэрэн, бэйэ бэйэҕэ ыалдьыттаһан, сылдьыһан уонна онтон астыныыны ыллыбыт. Бэйэбит дьоммут даҕаны сүрдээҕин мындырдар эбит диэн кэпсииргэ да үчүгэй.
Дьүүллүүр сүбэҕэ  үлэлээтилэр: 1.Корнилова Анастасия Ивановна (эдэр ыал ийэтэ, кулууп үлэһитэ, икки эмдэй сэмдэй кэрэчээн кыргыттарга иһирэх ийэ)
2. Эдэр ыччат бэрэстэбиитэлэ, республиканскай волонтердар бөлөхтөрүн салайааччыта, олоххо позитивнай көрүүлээх Борис Басыргасов.
3. Худаева С.М. - проект автора, кулууп директора.
Мыреева Е.Е. оҥоһуктарыгар 50-н тахса дьон оҕолорунаан кэлэн хаартыскаҕа түһэн, махтал тылларын эттилэр. Онон саамай элбэх киһи сылдьан,  сэҥээриини ылан анал бирииһинэн наҕараадаланна.
Инники да өттүгэр тэрээһиннэргэ эдэр ыаллар көхтөөхтүк кыттаргытыгар ыҥырабыт.
Күрэх кыттыылаахтарыгар барҕа махтал буоллун. Баҕарабыт өссө ситиһиилэри, саҥа идеялары, олоҕу кытта тэҥҥэ иннигит диэкки баран иһэргитигэр!

СЦД "Эйгэ". Уолбут. 12.08.2024с